வேலூர் அரசு பள்ளியில் மாணவனை பிரம்பால் அடித்த ஆசிரியர் மீது வழக்கு

வேலூர் கொணவட்டத்தை சேர்ந்தவர் ஹயாத்பாஷா. இவரது மகன் இம்ரான்பாஷா(வயது 13). கொணவட்டம் அரசு மேல்நிலைப்பள்ளியில் 7-ம் வகுப்பு படித்து வருகிறான்.

இந்த நிலையில் இம்ரான்பாஷா மதிய உணவு இடைவேளைக்கு பிறகு தாமதமாக பள்ளிக்கு வந்தான். இதை பார்த்த பள்ளி ஆசிரியர் உலகநிதி கண்டித்தார். அப்போது அவர், மாணவனை பிரம்பால் அடித்ததாகவும், இதில் மாணவனுக்கு காயம் ஏற்பட்டதாகவும் கூறப்படுகிறது. உடனடியாக மாணவனை அவரது பெற்றோர் அரசு ஆஸ்பத்திரியில் சேர்த்தனர்.

இதுகுறித்து வேலூர் தாலுகா போலீசில் புகார் செய்யப்பட்டது. போலீசார் ஆசிரியர் உலகநிதி மீது வழக்கு பதிவு செய்து விசாரணை நடத்தி வருகின்றனர். மேலும் இந்த சம்பவம் தொடர்பாக கல்வித்துறை அதிகாரிகளுக்கும் போலீசார் அறிக்கை அளித்துள்ளனர்.