முதுகலை தமிழ் ஆசிரியர் தேர்வு பட்டியல் வெளியீடு

முதுகலை தமிழ் ஆசிரியராக, 605 பேரின் தேர்வு பட்டியலை, ஆசிரியர் தேர்வு வாரியம் (டி.ஆர்.பி.,), நேற்று வெளியிட்டது. இவர்கள், விரைவில், அரசு மேல்நிலை பள்ளிகளில், பணி நியமனம் செய்யப்படுவர்.

அரசு மேல்நிலை பள்ளியில், 2,881 முதுகலை ஆசிரியரை நியமனம் செய்ய, கடந்த ஜூலையில், தேர்வு நடந்தது. அக்டோபர், 7ல், தமிழ் பாடம் தவிர்த்து இதர பாடங்களுக்கு, தேர்வு முடிவு வெளியானது. வழக்கு காரணமாக, தமிழ் பாட தேர்வு முடிவு வெளியாகவில்லை. இதன்பின், உயர்நீதிமன்ற மதுரை கிளை அனுமதியின் பேரில், கடந்த மாதம், தமிழ் பாட தேர்வு முடிவை வெளியிட்டு, டிசம்பர், 30, 31ல், சான்றிதழ் சரிபார்ப்பை, டி.ஆர்.பி., நடத்தியது. இதையடுத்து, 605 பேரின், தேர்வு பட்டியலை, www.trb.tn.nic.in என்ற இணையதளத்தில், நேற்று, டி.ஆர்.பி., வெளியிட்டது. "இவர்களுக்கான பணி நியமன உத்தரவுகளை, பள்ளிகல்வி இயக்குனர், தனியாக வழங்குவார்' என, டி.ஆர்.பி., அறிவித்துள்ளது. தமிழ் பாட இறுதி பட்டியலை தொடர்ந்து, விரைவில், மற்ற பாடங்களுக்கான தேர்வு பட்டியலையும், தேர்வர்கள் எதிர்பார்க்கலாம்.