மாணவிகளுக்கு ஆபாசப் படம்: பள்ளியை முற்றுகையிட்டு போராட்டம்

புதுச்சேரியை அடுத்த அரும்பார்த்தபுரம் அரசு உயர்நிலைப்பள்ளி ஆசிரியர்கள் மாணவிகளுக்கு ஆபாசப் படம் காண்பித்ததாகக் புகார் தெரிவித்து, மாணவிகளின் பெற்றோர் புதன்கிழமை பள்ளியை முற்றுகையிட்டு போராட்டம் நடத்தினர்.

அரும்பார்த்தபுரம் அரசு உயர்நிலைப்பள்ளியில் 500 மாணவ, மாணவிகள் பயின்று வருகின்றனர். இந்நிலையில் செவ்வாய்க்கிழமை ஒரு மாணவி தனது வீட்டுக்கு அழுதவாறே சென்றுள்ளார்.

அவரது பெற்றோர் விசாரித்த போது, பள்ளி வகுப்பறையில் 3 ஆசிரியர்கள் சேர்ந்து ஆபாசப் படங்களை கணினியில் காண்பித்து பார்க்குமாறு கூறி கட்டாயப்படுத்தியதாகக் கூறியுள்ளார்.

மேலும் சில மாணவிகளுக்கும் இதேபோல் ஆபாசப் படங்களை காண்பித்ததாகவும் கூறப்படுகிறது.

இதனால் ஆத்திரமடைந்த மாணவிகளின் பெற்றோர் 100-க்கு மேற்பட்டோர், அரும்பார்த்தபுரம் பள்ளிக்குச் சென்று முற்றுகைப் போராட்டத்தில் ஈடுபட்டனர்.

புதுவை மாணவர் கூட்டமைப்பின் தலைவர் சுவாமிநாதன், பி.டி.ஏ. நிர்வாகிகளும் இப்போராட்டத்தில் கலந்து கொண்டனர்.

ஆபாசப் படம் காண்பித்த ஆசிரியர்கள் மீது நடவடிக்கை எடுக்க வேண்டும் என அவர்கள் வலியுறுத்தினர்.

தகவலறிந்த கல்வித்துறை இயக்குநர் வல்லவன், முதன்மைக்கல்வி அலுவலர் கலைச்செல்வன் ஆகியோர் பள்ளிக்குச் சென்று பேச்சுவார்த்தை நடத்தினர். பின்னர் தலைமை ஆசிரியர், ஆசிரியர்களிடம் அவர்கள் விசாரணை நடத்தினர்.

இப்புகார் தொடர்பாக 3 ஆசிரியர்களை பணியிட மாற்றம் செய்ய நடவடிக்கை எடுக்கப்பட்டுள்ளது. மேலும் அவர்கள் மீது துறை ரீதியாகவும் கடும் நடவடிக்கை எடுக்கப்படும் எனவும் அதிகாரிகள் உறுதி கூறினர்.

இதையடுத்து போராட்டத்தில் ஈடுபட்டவர்கள் கலைந்துச் சென்றனர்.