கோடை விடுமுறைக்குப்பின் பள்ளிகள் ஜூன் 2-ந்தேதி திறப்பு

தமிழ்நாட்டில் அரசு உயர்நிலைப்பள்ளிகள், அரசு மேல்நிலைப்பள்ளிகள் அனைத்துக்கும் கோடை விடுமுறை விடப்பட்டுள்ளது. தொடக்கப்பள்ளிகளுக்கு மட்டும் நாளை (வியாழக்கிழமை) மே 1-ந் தேதி முதல் விடுமுறை விடப்பட உள்ளது. 

விடுமுறைக்கு பின்னர் தமிழ்நாட்டில் உள்ள அரசு பள்ளிகள், அரசு உதவி பெறும் பள்ளிகள், தனியார் பள்ளிகள் அனைத்தும் ஜூன் மாதம் 2-ந் தேதி திறக்கப்படுகின்றன. அப்போது 1-வது வகுப்பு முதல் பிளஸ்-2 வரை (11-வது வகுப்பு தவிர) அனைத்து வகுப்புகளும் அன்றைய தினம் தொடங்கப்பட உள்ளன. 

எஸ்.எஸ்.எல்.சி. தேர்வு முடிவு மே 23-ந் தேதி வெளியிடப்படும் என்று அதிகாரப்பூர்வமாக அறிவிக்கப்பட்டுள்ளது. அதன்பின்னர் மதிப்பெண் சான்றிதழ் வழங்கப்பட உள்ளது. தேர்வு முடிவு வந்த அன்றே மதிப்பெண்ணை இணையதளத்தில் ஜெராக்ஸ் எடுத்து விடலாம். அதைக்கொண்டு பிளஸ்-1 சேரும் பள்ளிகளில் விண்ணப்பிக்கலாம். 

மாணவர் சேர்க்கை முடிந்து ஜூன் மாதம் 16-ந் தேதி பிளஸ்-1 வகுப்புகள் தொடங்குகின்றன. சில பள்ளிகளில் ஜூன் மாதம் முழுவதும் பிளஸ்-1 மாணவர் சேர்க்கை நடந்து கொண்டே இருக்கும். கோடை விடுமுறைக்கு பள்ளிக்கூடங்கள் திறக்கும் அன்றே அரசு பள்ளிகள், அரசு உதவி பெறும் அனைத்து பள்ளிகளிலும் படிக்கும் அனைத்து மாணவ-மாணவிகளுக்கும் பாடப்புத்தகங்கள் இலவசமாக வழங்கப்பட உள்ளது. மேலும் 2 செட் சீருடைகளும் வழங்கப்பட உள்ளது. 

தமிழ்நாடு பாடநூல் கழகம் ஏற்கனவே 60 சதவீத பாடப்புத்தகங்களையும், நோட்டு புத்தகங்களையும் அச்சடித்து தமிழ்நாடு முழுவதும் அனுப்பிவைத்துள்ளது. 1-வது முதல் 5-வது வகுப்பு வரை உள்ள பாடப்புத்தகங்கள், நோட்டுபுத்தகங்கள் அந்தந்த மாவட்ட தொடக்க கல்வி அதிகாரிகளுக்கு அனுப்பி வைக்கப்பட்டுள்ளன. 

அதுபோல 6-வது வகுப்பு முதல் பிளஸ்-2 வரை உள்ள பாடப்புத்தகங்கள், நோட்டு புத்தகங்கள் மாவட்ட முதன்மை கல்வி அதிகாரிகளுக்கு அனுப்பி உள்ளனர். 100 சதவீத புத்தகங்களும் அதாவது மொத்தம் 7 கோடி பாடப்புத்தகங்கள் அச்சடிக்கப்பட்டு மே மாதம் 15-ந்தேதிக்குள் தயாராகி மாவட்டம் வாரியாக அனுப்பி வைக்கப்பட உள்ளது. 

பள்ளிக்கூடங்கள் திறக்கும் அன்று அனைத்து பாடப்புத்தகங்கள், நோட்டு புத்தகங்கள் மாணவ-மாணவிகளுக்கு வழங்கப்படும். அனைத்து விலை இல்லா பொருட்களும் பள்ளிக்கூடம் திறந்து 6 மாதங்களுக்குள் வழங்கப்பட உள்ளது என்று கல்வித்துறை அதிகாரி ஒருவர் தெரிவித்தார்.